INTASHYO

  INTASHYO

Ibikuba biracika

Abenshi baritotomba

Ngo Korona ibabujije ibyiza

Byo gusabana n’ababo

Mu minsi mikuru yegereje.

Nibuka ko na mbere ya Korona

Ayo mahirwe mwayavukijwe

Aho mwibereye iyo mu bihome

Mu magereza menshi ku isi

No mu gihugu cyabibarutse.

Amatara y’amahoro acanye henshi

Benshi bakataje mu kwemera

Ari nako baririmba urukundo

Yewe ngo n’icyizere ni ntakuka

Isi izira amakemwa ngo ni umurage.

Imico tutazi turamiraza

Turanyaruka dusiganwa n’igihe

N’akayabo kayoyoka

Ngo Emmanuel asange turi tayari.

Mwaba se namwe mubarirwa

Mu bushyo bw’umucunguzi dutegereje?

Imyaka ibaye myinshi

Uko mubayeho byabara umwanzi

Niwe watojwe kurubakanira.

Muri ubwo buzima bushariye

Mugenda mushira urusorongo

Bisa n’ibyafashwe nk’ibisanzwe

Iminsi ishaka kubatwibagiza

Ngo tuzabibuke hatakiri n’umwe

Ibyanyu byose bibe amateka

Azaganurwa imyaka amagana.

Nakomeje kubatekereza

Sinatinyuka kubishyira ahabona

Ko benshi muri mwe muzira ibinyoma

Abanyabyaha bidegembya.

Muri mu cyimbo cy’imbaga nyamwinshi

Yakomeje kubuzwa amahwemo

Kubera ubugambanyi

N’ubucakura bwa bamwe

Bimuriye ubwenge mu gifu

Kitagira ingoma n’imwe gihaga.

Nzinduwe rero no kubakomeza

Nshishikajwe no kubahumuliza

Ndifuza ko mwakwibukwa

Muri iyi ntashyo mbazaniye.

Muri ibi bihe bidasanzwe

Buri wese ashishikajwe no gusabana n’abe

Ngo namwe mwibukwe muri bo

Kandi n’iyo igitangaza cyabakorerwa

Namwe mukabasanga

Nashima ko nazikabije.

Iyi ni intashyo yanyu mwese

Mwaciriwe urwo gufungwa

Imyaniko cyangwa burundu

Muzira gusa akagambane

N’imyanya mwarimo mu butegetsi

Bakabaryoza uko mwavutse.

Mwavutse nk’abandi

Mubyirukira ahitwaga Paradizo

Benshi barariye rwa ntambi

Mbere y’uko abagome bayigabiza

Ari nabo bayobeje bwa bwato

Baraturoha ntitwarohorana

Ubumwe bwacu barabuzimiza

Amahoro yacu ubwo arasuhuka

Amajyambere ahera mu mujyi.

Umuhanuzi abonye bikomeye

Abona ko ubwiyunge ari ngombwa

Yihutira guha agaciro ubuzima

Aho kumwumva baramuhitana

Ibi utabizi arigiza nkana.

Nimwakire intashyo yanjye

Mwe babyeyi mwavukijwe kurera abanyu.

Murakoma basore n’inkumi

Mwambuwe ubuto bwanyu?

Muracyabaho ntiti zacu

Zavukijwe gutanga ubumenyi

Mukabuzwa kujijura rubanda?

Ndabatashya bahanzi bacu

Mwakandamirijwe inganzo.

Murakomeye ngabo zacu

Twakeshaga umutekano

N’ubusugire bw’icyo twanyazwe?

Ndabazirikana na mwe mwese

Bahinzi-borozi twakeshaga kubaho

Bakozi ba leta n’abikoreraga

Namwe mwatugezagaho amakuru

Kubahomba byaraduhombanyije

Kubazirika ntibyazituye ibibazo.

Sinabacira urubanza

Sinanabogeza by’ikirenga

Singambiriye kubagira abere

Hari ubishinzwe utuye Ijabiro

Ndibutsa gusa agaciro kanyu

N’akamaro kanyu mu muryango.

Ubwo abatuvuyemo batazagaruka

Nitwite kubagifite akuka

Ni abacu uko bari kose

Burya ngo akamuga karuta agaturo

Kandi nabo baradukumbuye

Icyaduhuza cyaririmbwa.

Nimubabarirwe

Nimuhozwe

Nimuhumulizwe

Nimwitabweho

Nimusurwe

Nimwumvwe

Nimusubizwe

Nimuzirikanwe

Nimunezerwe

Nimukundwe

Nimufungurwe

Nimwidegembye

Ndasaba ububasha ku mbabazi

Ndifuza uburenganzira ku byemezo

Nyotewe ubutabera busesuye.

Ngiyo intashyo yanjye.

Ndajwe ishinga n’uko mutibagirana

Ngo mukomeze kuba ibitambo

Kuri alitari y’ikinyoma

Cyahawe intebe mu rwa Gasabo

Kigasakara isi yose

Itabacira n’akari urutega.

Niyo mpamvu nje kubakomeza

Ngo n’abandi bose babibonereho

Babavungurire ku munezero

Bateganya gusozanya umwaka

No gutangira undi mu cyizere

Cy’amahoro arambye tunyotewe.

Noheri nziza n’umwaka mushya muhire

15.12.2020

Murorunkwere Dariya

Laisser un commentaire

%d blogueurs aiment cette page :