U Rwanda rugeze aharindimuka koko: Ninde uzadukura mu kaga? Enock Safari Buhendwa.

Maze imyaka igera kuri irindwi (7) mvuye mu Rwanda bwa kabiri kuko ubwa mbere namaze itatu(3) mu gihugu cyitwaga Zaire nyuma kikaza guhinduka Repubulika iharanira Demokarasi ya Congo. Ni ukuvuga ko nabaye mu Rwanda ku ngoma ya FPR mu myaka igera ku munani(8) kuva muri Kanama 1997 kugeza mu Ukuboza 2005. Muri make ubutegetsi bwa FPR nagize amahirwe yo kutabubamo imyaka yose 18 bumaze. Gusa rero kuba ntarabaye mu Rwanda igihe cyose FPR imaze ku butegetsi ntibyambujije kumvishwa!!! Mu yandi magambo igihe gitoya namaze mu Rwanda cyampaye igikomere kidashira ku mutima. Aha wakwibaza uko Abanyarwanda babanye na FPR iriya myaka yose 18 babayeho, igisubizo kiri ku maso yabo. Barangwa n’ihahamuka n’ubwoba, kwishisha buri wese, yaba umubyeyi, umuvandimwe cyangwa inshuti, abenshi, hafi 70% bahorana inzara idashira kuko batungwa n’amafranga ari munsi ya 200 ku munsi, ndetse abagera kuri 18% baraye bari buvemo umwuka kubera inzara. Abayobotse ubutegetsi bw’agatsiko bashyizwe mu madeni batazi uko bazishyura bityo bahora bakoma amashyi. Abanyarwanda barimyoza wabasuhuza uti amakuru bakabanza guhigima, barangiza bati ni meza ntacyo twari tubaye!!! Biteye agahinda.  Iyo mbitekereje nibwo nibaza nti“ese ninde uzadukura mu kaga? Muri iyi nyandiko ndagira ngo nsangire n’abasomyi bimwe mu byo mbona Abanyarwanda bakwiye gutekerezaho kugira ngo tuve mu kangaratete u Rwanda rurimo.

1. Agatsiko kayoboye FPR niko Nyirabayazana w’aya mage yose.

Ku italiki ya gatatu Ukwakira 1990 nibwo inkuru yasakaye ku Kibuye aho nkomoka ko u Rwanda rumaze iminsi itatu rutewe n’Abantu baturutse mu gihugu cya Uganda ngo biyise FPR-Inkotanyi. Mu by’ukuri nari nkiri mutoya wo gusobanukirwa icyo intambara ivuga ariko numvaga abakuru bagira bati intambara iragatsindwa, irica, igasenya… Iminsi yakurikiyeho nihatiraga kumva radio Rwanda kugira ngo numve icyo intambara y’Inkotanyi isobanuye. Ngira ngo muribuka umunyamakuru witwa Florenti Kampayana wajyaga aduterera urwenya ari nako aduha moral mu gihe cy’intambara. Hari igihe Amabilis Sibomana yamuhaga antenne ngo ageze ku Banyarwanda amakuru yerekeye intambara maze agatangira agira ati: “mu ijoro  ryakeye za Nyenzi Nyagarwanda ziyise Inkotanyi ejo zitwikiriye ijoro zitera zigera ku ijana nuko Ingabo z’u Rwanda zizotsa igitutu zicamo magana abiri izisigaye zikwira imishwaro….”!

U Rwanda rwari rufite ingabo ziri mu nsi y’ibihumbi bitanu gusa, rwihutiye gukangurira abasore kujya ku itabaro ngo barwanirire igihugu cyabo. Ni inshingano za buri mwenegihugu kurwanirira igihugu cye igihe gitewe n’umwanzi. Mu gihe ariko hagendaga abasore bajya ku rugamba mu Mutara, ninako hari abandi basore baburirwaga irengero nyuma bikaza kumenyekana ko bagiye mu Rugano aho FPR yitorezaga. Mu gihe abenshi bajyaga mu gisirikare cy’u Rwanda babaga ari Abahutu, abenshi basangaga Inkotanyi bavaga mu bwoko bw’Abatutsi. Iki cyakuruye amakimbiranye akomeye mu mibanire y’Abanyarwanda: wasangaga Abasaza babiri baganira umwe atiumwana wanjye ni Ingabo y’igihugu, undi ati umwana wanjye ni Inkotanyi! Erega ubwo hakaba havutse ikibazo kandi birakomeye kubibuza. Ni ukuvuga ngo “abana bacu barimo kwicana”!!!! Ntavuze byinshi umuntu yahita yumva icyasigaraga mu mitima y’aba basaza bombi. Ikibazo gisa gutya kandi cyagaragaye no mu mashuri cyane cyane ayisumbuye aho abana bamwe baburirwaga irengero bigiriye mu Rugano, abasigaye ugasanga birirwa biyambariye inkweto zitwa rugabire zikozwe mu mapine y’imodoka ngo ni ugushyigikira FPR!

Ubwicanyi bwakozwe na FPR (kugeza n’uyu munsi butaramaganwa ku mugaragaro) niko bwakomezaga kwibasira Abanyabyumba nyuma ndetse bugera no ku Banyaruhengeri. Abarokokaga berekezaga Kigali ndetse baje guhabwa inkambi ahitwa(ga) Nyacyonga. Gusobanukirwa n’akaga aba Banyarwanda bahuye nako ntibyoroshye. Kugeza n’uyu munsi nta muntu n’umwe mu buyobozi bw’ u Rwanda wigeze agira ati “ibyo mwakorewe biragatsindwa, nimukomere mwararokotse”! Ako kaga bagashyizwemo na FPR .

Urwango rwakongejwe n’intambara yatewe na FPR Inkotanyi rwakomeje kugenda rwiyongera ku buryo mu gihe cy’imyaka ine abantu bari bararakaye cyane, batarakariye abateye u Rwanda gusa ahubwo barakariye n’undi wese wari ubashyigikiye cyangwa wabikekwagaho gusa . Ndibuka umwe mu bantu bari baravanywe mu byayo wirirwaga i Kigali hafi yo kwa Lando asabiriza ku muhanda, nuko imodoka irahagarara, urugi rurafunguka umutegarugori amurebana ikigongwe cyinshi amuha amafranga y’u Rwanda 500, amusezeraho amubwira ati Imana igufashe. Uwari yakiriye amafaranga ntiyishimye kuko yaravuze ati: yewe uyu mudamu aramfashije ariko ni umututsikazi! Ibi biravuga ko aho ibintu byari bigeze iyi mpunzi yumvaga nta cyiza cyaturuka ku muntu wo mu bwoko bw’Abatutsi.  Igihugu cyari gikeneye umuyobozi ufite imbaraga, ubwenge n’ubushishozi kugira ngo uru rwango rutagira ibyo rwangiza.

Mu gihe amasezerano y’amahoro ya Arusha yasinywaga, abantu bari batangiye kwiruhutsa bagira bati ahari umenya birangiye, ntitugipfuye. Nyamara aho indege ya Habyarimana ihanuriwe amahoro twari dutegereje yarayoyotse. Rwa rwango navuze haruguru habuze umuyobozi ukomakoma, ni uko… (Fata amasegonda 30 ucecetse wibuke Inzirakarengane zose zishwe) .Uko byagenze ngo ibara umupfu uretse ko ukize inkuba ngo ayiganira kandi ngo ijoro rikabara uwariraye! Ku bwanjye nsanga intambara ya FPR n’ubugizibwanabi bwayiherekeje aribyo ntangiriro y’akaga Abanyarwanda barimo.

2. Nta butabera, nta mahoro.

FPR ikigera i Kigali, yihutiye gusakuma abantu bari banze gupfa no guhunga, aha ndavuga abo yari yakubise akandoyi n’agafuni iyo za Byumba na Ruhengeri ariko Imana igakinga ukuboko. Aba bose yarafashe irunda mu magereza ugasanga ahari hagenewe infungwa 2.000 hari 10.000. Aha naho ryabara uwariraye! FPR yabwiraga abantu bose ko yimirije imbere ubutabera nyamara uko imyaka yicumaga wasangaga hari ikindi kigamijwe. Nawe se umwicanyi yafatwaga nk’umwere, yewe ahubwo ugasanga umwere ariwe ugirirwa nabi kurushaho. Ibi byagize ingaruka mbi ku myumvire y’abanyarwanda, yewe hari n’abageze aho bagatangira kwicuza impamvu batishe ngo nabo bagirirwe ikigongwe na FPR. Ibi bihamywa n’abageze aho bakajya bihimbira inyandiko zo kwirega bibeshyera ibyo batakoze ngo kugira ngo bafungurwe vuba kuko bemeye icyaha. Ibi byahumiye ku murari aho noneho GACACA itangiye guca ibintu. Dore ngo noneho abantu bararimirwa ibisinde bakikorera n’ibyo batagizemo uruhare kandi ubabeshyera ntawe umutunga urutoki, ikindi hakaba nta Muhutu wagira ati “nanjye abanjye biciwe hariya ku munyinya”, ahubwo n’amagufa akabona bayataburura bayerekeza i Kantarange kuyasiga vernis no kuyanika ku gasozi. Agahinda ntikica koko! Ariko se aho hari uwibuka ko kagira mubi?

Hagati aho uwabashije gucika FPR mu Rwanda no muri Congo akagera aho atangira kuvuga ibyamubayeho, yashyizwe kuri liste y’aba genocidaires, ashakishwa uruhindu ku isi yose… Ngayo nguko.

Ntibiteye kabiri biramenyekana ko FPR atari shyashya, ko nayo yagakwiye kujya imbere y’amategeko ikagira ibyo isobanura. Umuyobozi wayo n’ibyegera bye bati “ndagacibwa ibere”. Kuri bo ubutabera bureba Abishe Abatutsi, ubwoko bw’Imana nk’uko Mbangurunuka abivuga. Nimundekere nivugire ibintu uko biteye, kuvuga ukuri ntibyica umutumirano :  Umututsi warokotse ahabwa imfashanyo zimutunga, Umuhutu warokotse asenyerwa akaruri. Umuhutu wishe Abatutsi ahanwa n’amategeko, Umututsi wishe Abahutu yambikwa imidari y’ubutwari! Reka nongere nibutse ko ibintu nk’ibi gukomeza kubiceceka ari nko gutereka igihugu ku kirunga gishobora kuruka isaha iyo ariyo yose!

3.Inzozi za Padiri  Nahimana  Thomas zo gutsinda Agatsiko-Sajya no kuyobora u Rwanda .

Nyuma y’urupfu rwa musenyeri Sibomana w’i Kabgayi, uyu mupadiri na mugenzi we Fortunatus Rudakemwa babaye aba mbere mu bihayimana b’Abanyarwanda bahagurutse bakajya ahagaragara bamagana ubutegetsi bw’igitugu bwa FPR. N’ubwo inyandiko zihita ku rubuga rwe atari bo bazandika zose, navuga ko rwose aribo nkesha amahirwe yo kuba naratinyutse nanjye nkerura, nkerekana akarengane Abanyarwanda bagirirwa muri iki gihe.  

Mu minsi yashize ubwo nari muri Pennysilvania (USA) naganiriye n’Abanyeshuri ba Misercordia University bambaza icyo nkora ngo U Rwanda rugire ubuyobozi burukwiye. Nagize ntya mbaramburira inyandiko zose nanditse zimwe ziri mu rurimi rw’ikinyarwanda baravuga bati ubonye iyaba twumvaga natwe Ikinyarwanda! Batangajwe n’ukuntu urubuga rwa Padiri Nahimana Thomas rusomwa cyane kuko statistics zerekanaga ko nibura abantu hagati 9.000 na 10.000 barusoma buri munsi, nuko basoza bambwira bati Courage. Padiri Thomas twese tuzi uko yatotejwe na Musenyeri we ndetse na Leta ya Kigali bamuziza ko yatinyutse guhangara Afande Kagame. Bitari ukumutaka rero, Thomas kugeza ubu afite amahirwe yo kuba umwe mu Balideri Abanyarwanda bakwibonamo. Gusa rero ndareba ngasanga na we afite ibibazo bizamutega, ndetse yareba nabi akaba yagwa. Reka tubirebe:

(1)Padiri Thomas ni umwe:

Mu minsi yashize hari umugabo witwa Mahoro Zelote washyize ahagaragara uburyo abona revolution mu Rwanda yagenda. Yatangiriraga ku ikipe y’abantu bakeya bahuje umugambi. Ejo bundi Padiri nawe yemeye rwose ko akeneye ikipe y’abantu bifitemo ubushake. Ese aba bantu barahari? Dore impamvu zituma babura.

FPR yafungiranye Abanyarwanda hagati y’ ibikuta bitatu mu Rwanda isigaza igikuta kimwe gifunguye, aricyo kwinjira muri FPR. Ni ukuvuga ko ushaka kuramuka yinjira muri FPR, akemera kubaho nk’inka cyangwa ihene ikamwa, akemera kutagira ijambo no kutagira igitekerezo. Bene aba bantu ndabibutsa ko kuba itungo ritabagwa vuba atari impuhwe z’umushumba, ahubwo aba ari inyungu itubutse atereje, igihe iyo kigeze araribaga nta kabuza!!!

Kuri ibi hiyongeraho ko ubwicanyi FPR yakoreye Abanyarwanda bwabateye ubwoba, genocide yakorewe Abatutsi yahahamuye abarokotse, FPR ibumvisha ko ariyo mukiza. N’ubwo benshi mu Barokotse jenoside yakorewe Abatutsi bazi neza ko Umukiza wabo ariwe Nyirabayazana, ntibatinyuka kubyatura ngo babivuge kugira ngo barebe ko baramuka ! Mushayidi Deogaratsiyasi ni umututsi warokotse jenoside hamana , nyamara kuko yagerageje kuvugisha ukuri ku kibazo cy’uruhare rwa FPr mu gusenya u Rwanda, afungiwe i Kigali ashinjwa ingengabitekerezo ya jenoside ! Undi mugabo ni uw’iki?

Abahutu batakoze jenoside bashyizwe mu magereza, bamwe barekurwa babwiwe ko bitarangiye. Nabo bahorana ubwoba bwo kuvuga akarengane bagiriwe ahubwo bagahitamo gukoma yombi bashima ko FPR yabafunguye! Babaho mu bwoba, nta cyizere bifitemo, usanga bibwira bati twe ibyacu byararangiye reka tubyare abana wenda bo bazagira ubuzima! Ntibashobora kugira bati abana bacu kugira ngo babe aheza tugomba kuhabategurira. Muri make bumva kuba baravuye muri gereza ari impuhwe bagiriwe. Keretse niba hari uwatorotse gereza kandi akaba azi ibyaha yakoze, najye ahabona asabe Abanyarwanda imbabazi. Naho uwafunguwe binyuze mu mategeko, yaburanye agatsinda urubanza agafungurwa, kubyinira FPR ngo yaramufunguye ni nko gucibwa akaguru n’umuntu abizi neza kandi abishaka, yarangiza akakugurira imbago maze ukamubyinira ngo ni umunyampuhwe atumye ubasha kugenda!!

Hari urubyiruko rutari rukeya rwemera kujya muri FPR ngo rubone akazi keza (ba Mpemuke ndamuke). Umushahara ugasanga utubutse ikiguzi kikaba guceceka. Kuri aba basore bajijutse nibatekereze sustainability y’imibereho bafite ubu. Urarya, ugahaga , ugasagura ayo kujyana kuri beach nyamara hari abaturage bari gukamwa kandi ntaho bakura. Umunsi umwe mushobora kuzashiguka mubabonye  bariye karungu, bakavuga bati  nimwe muturya, muragahera!. Ese ufite imbaraga zingana iki igihe uzaba ugiye muri mission ku Rusumo ugasanga bariye karungu hafi y’i Rwamagana? Ikindi ibuka ko buri mwaka Universités ziha impamyabumenyi abantu baruta imyanya y’akazi ihari. Iyo abantu benshi cyane barwanira ibiryo bikeya haza umwiryane ushobora kuganisha kucyo uwitwa Thomas Malthus yise “crisis point” muri An Essay on the Principle of Population. Ni ukuvuga aho abantu bamwe baba bagomba gupfa kugira ngo abasigaye babe bafite ibibatunga bihagije. Mu gihe cya Malthus we yivugiraga ibiribwa gusa, none mu Rwanda ho si ibiribwa gusa bibuze habuze n’ ibindi byinshi. Amahirwe Kagame akigenderaho ni uko uru rubyiruko rugihagaritse umutima , rutarabona umwanya wo kwibaza kuri iki kibazo ngo rutangire gushaka umuti  wo kukiburizamo hakiri kare.

Ugize atya akabasha kuva mu gihugu ariruhutsa akavuga ati hehe no gusubira i Rwanda. Akigira mu Bufaransa, mu Bubirigi cyangwa Canada na America, akarya agahaga, akanywa divayi akavanga na liqueur agasinda ati ninshaka nzicwe n’inzoga aho kwicwa na Kagame! Wamubwira uti abo wasize mu Rwanda? Ati nabo bazirwarize cyangwa bemere bayoboke, jye mfite ubwenegihugu ntaho nzajya. Hari benshi bo bagira bati nifitiye umugore n’abana sinshaka kubasiga, mbese kuri bo U Rwanda ntacyo ruvuze, urutindo rwacitse bambutse.

Ntabwo ari uguca intege padiri ariko ntibyoroshye. Reka muhe urugero rwa hafi: azajye ajya mu myigaragambyo yatumijwe na RNC n’andi mashyaka ya opozisiyo arebe abantu baba bahari: Usanga ari hagati ya batanu na barindwi kandi abayiteguye bakahagera amasaha 4 nyuma y’igihe bari bateganije. Kuba umwe bishobora kuba ikibazo niba Padiri Thomas ashaka gufasha Abanyarwanda kwifasha.

(2) Padiri Thomas ni umukene

Padiri Thomas nta mafaranga menshi afite, cyakora mbona yambara neza ndetse ubona rwose atabayeho nabi.Yego ubukene bwa Padiri bushobora kuba “un atout” kuko abantu bakennye akenshi nibo bamenya inkeke z’abaturage bagenzi babo bakennye. Bityo rero Padiri ashobora kugirirwa icyizere.  Gusa rero urugamba rwo kurwanya Agatsiko gakize si ikintu cyoroshye. Bigusaba kuba ufite cash itubutse. Kubera iyi mpamvu Agatsiko kazagira gatya gashore imari muri ya Kipe ishonje maze bose batangire gusezera mu ishyirahamwe rya Padiri bitahira i Kigali. Ikizakurikiraho ni ukujya ku rubuga igihe.com akaba ariho tumenyera amakuru ngo bombori bombori kwa Nahimana Thomas. Ikindi cyiyongera kuri cash itubutse Agatsiko gakoresha, ni iterabwoba riba rigeretseho. Iyo iterabwoba rizanye na cash hari abibwira ko haba hari options ebyiri gusa: kwemera cash ukitandukanya, cyangwa se kwanga cash ukicwa n’abawe bari mu Rwanda bagashyirwa ku nkeke. Abantu batari abacakara b’ubwoba rero ahari babaho ariko kubabona ni ikibazo!  

(3)Padiri Thomas yihaye Imana

Iki cyo gishobora kutaba ikibazo kinini kuko kuba yarihaye Imana bivuga ko yagombye no kwemera kwitangira Intama ze. Gusa rero umenya hari amategeko binyuramo. Ubwo azi uko yabigenza. Azatwibire akajambo tuve mu gihirahiro kuko hari abo tubana numva bibaza ibibazo byinshi : ngo none Musenyeri we ko atamworohera yazamudutwara twaba abande ? Ko yavuze ko afashe umwaka umwe gusa w’ubwigenge nurangira bizagenda gute , aho ntazisubirira muri paruwasi akadusiga twenyine ku rugerero ? Ko uwiyita Paul Nangurunuka yavuze  ko hasobora gukorwa ubufindo padiri Thomas ngo akibona ari Musenyeri wa Gikongoro bishaka kuvuga iki ? Aho Agatsiko ntikakumvikana n’abayobozi ba kiliziya gatolika (ko tubona bamwe basa n’abiyemeje gukorera FPR ku mugaragaro!)  bakamucecekesha muri buriya buryo ?

Uyu mupadiri yari atangiye kudutera ka morali no kudufasha kumva ko natwe Abanyarwanda bakadamijwe n’Agatsiko twifitemo ingufu zihagije zo kwibohoza tutagombye gufata imico mibisha y’Udutsiko tw’abasilikari bazi kurasa no kwica rubanda gusa.  

Umwanzuro:

U Rwanda n’Abanyarwanda bari mu kaga  FPR-Inkotanyi yagizemo uruhare rukomeye cyane. Niyo mpamvu bishimisha benshi iyo habonetse umuntu uvuga ati njye nabafasha guhangana n’aka Gatsiko kabarimbuye !Iyo aba ari inkuru nziza y’umukiro ku Banyarwanda benshi bakomerekejwe n’aya mateka mabi twagize. Gusa UBWOBA bukomeje kuba bwinshi mu mitima y’abanyarwanda kuko bavuga ngo iyagukanze ntijya iba inturo. Mu by’ukuri u Rwanda  rukeneye abantu batsinda icyo cyoba cyatwokamye , bakemera kwitanga batitangiriye itama kugira ngo bigirire akamaro igihugu cyose. Abantu bemera ijuru bakagira bati twiteguye kujya mu ijuru kandi tuzi ko ntawe ugerayo atanyuze mu nzira y’umusaraba n’urupfu. Abantu bagira bati nanze kubaho ntariho, reka mpaguruke mfatanye n’abandi urugamba rudasesa amaraso, ruharanira amahoro gusa. Bene abo si benshi ariko bariho. Bakwiye gushakana, bakaganira, bakanoza umugambi, bagatangira ubutumwa. Iyo igihe kigeze buri wese yakagombye kwibuka akajambo padiri Thomas akunda kuvuga ngo “No hakurya y’Imva hari ubugingo”, kandi ni koko rero ngo“wanga kugenda ukagwira ubusa “!  

Kandi reka mbacire undi mugani : Iyo rubanda yiyemeje gushira ubwoba uwayikangaga ni we unnya mu myenda! Kandi bwarakeye biraba. Dore aho nibereye!  

Nifurije Padiri Thomas gukabya inzozi.

Mumugire mwese Demokarasi.

Enock Safari Buhendwa

busenock@yahoo.fr

Diploma in Commonwealth Values and Youth Development

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

%d blogueurs aiment cette page :