Ndasaba Kagame n’Agatsiko ke kwegura bakarekeraho gusakuma ibya Rubanda! Mutimutuje Amina.

Iyi nayo ni Kigali y’ubu ! N’uwabuze icyo agaburira umwana we Agatsiko kamuhatira kuriha umuriro ucanwa hanze nijoro !!

Nyuma y’aho gahagarikiwe inkunga kahabwaga n’ibihugu by’amahanga bitandukanye kazira gushoza intambara mu gihugu cy’igituranyi cya Kongo no gushyigikira imitwe y’ubwicanyi n’iterabwoba nka M23, Agatsiko k’Abasajya b’Abega gakomeje gusamba gasambira ibya rubanda ku ngufu. Kashyizeho ikigega AgDF maze kirirwa kabeshya rubanda ko iki kigega gikomeje gushyirwamo amafaranga nyamara ari amayeri, amacenga n’amagambo atagira ibikorwa ndetse na za cheki z’amafaranga za baringa. None kamaze kubona ko ari ko kibeshye, gatangiye gusahura rubanda kabinyujije mu bujura bw’ingufu.

Abagura umuriro barakatwa ku ngufu amafaranga

Iyo ugeze hirya no hino mu gihugu, by’umwihariko ahagurirwa umuriro w’amashanyarazi usanganirwa n’amarira n’imvugo zuje amaganya by’abaturage. Ibi bakaba babiterwa no gukatwa amafaranga ku buryo butunguranye ndetse no kutubahirizwa kw’amasezerano bagiranye n’ikigo cy’Agatsiko gishinzwe umuriro w’amashanyarazi n’amazi  EWSA.

Guhera mu ntangiriro z’Ukwakira 2012, buri muturage ugiye kugura umuriro w’amashanyarazi arasabwa kubanza kwishyura 1.500Frs maze akabona kongeraho ayo kugira ngo ahabwe umuriro yifuza. Kubera ko umuriro ugurwa hakoreshejwe ikoranabuhanga ry’imashini, ntawe ushobora kuwuhabwa atabanje kwishyura ayo mafaranga asabwa. Iyo abaturage babajije impamvu bakatwa ayo mafaranga, abacuruza umuriro bavuga ko EWSA yababwiye ko ari ay’ifatabuguzi rya Cashpower y’umuriro ry’amezi atatu: Kanama, Nzeli n’Ukwakira. Ariko bamwe mu baturage bavuga ko bari barishyuye amwe muri aya mezi. Ubusanzwe ugura umuriro, imashini imukataho 500Frs buri kwezi (automatiquement). Nyamara umwe mu bakozi ba EWSA utarashatse ko amazina ye atangazwa kubera impamvu z’umutekano we, avuga ko aya mafaranga akatwa abagura umuriro ari ayo gushyira mu kigega AgDF kuko ayo EWSA yemeye gutangamo nta yo yari ifite.Uretse gukatwa amafaranga kandi, ikindi kiriza abaturage ni uko iki kigo kitubahirije amasezerano cyari cyaragiranye na bo ubwo cyabakopaga, kikabaha ifatabuguzi ry’umuriro. Umwe mu baturage wahawe umuriro ku mafaranga 60.000Frs  maze bagasezerana ko azishyura mu mezi ane, atanga 15.000Frs buri kwezi, avuga ko yagiye kugura umuriro agasabwa kubanza kwishyurira rimwe ibihumbi 45.000Frs ndetse na 1.500Frs ya cashpower noneho akabona kwishyura ay’umuriro ashaka. Kubera ko ntayo yari afite, avuga ko ubu atagicana bityo n’abana be ngo ntibagisubira mu masomo.Si ibyo gusa, EWSA yakuye agahu ku nnyo mu gukamura abaturage! Kuri ubu utumashini tubara umuriro wakoreshejwe baratwihutishije cyane, umuvuduko watwo bawukubye kabiri. Umuriro wamaraga icyumweru ubu uramara iminsi itatu gusa. Iyo uguze umuriro wa 1.000Frs umara igihe nk’icyo uwa 500Frs wamaraga. Ubu bugome bwose burakorerwa rubanda hagamijwe gusakuma amafaranga yo guha agatsiko k’Abasajya ka Kagame kayogoje igihugu n’akarere k’ibiyaga bigari gakora ibyaha by’ubwicanyi, ibya jenoside, iby’intambara, gufata ku ngufu, gushyira abana mu gisirikare, gufunga inzirakarengane, gushimuta abaturage, gushyira ku ngoyi, kurandura imyaka y’abaturage, gusenya amazu ya rubanda, kubicisha inzara n’ibindi. Ni akumiro!Abaturage barategekwa  kurara bacanye amatara yo hanze

Aha naho ni i Kigali: abakene basabwa kurara bacanye amatara yo hanze kubera ubwoba Agatsiko kifitiye ! 

Ubugome bw’Agatsiko ntibugira iherezo n’umupaka. N’ubwo Agatsiko kazamuye ibiciro by’umuriro w’amashanyarazi, ntibikabuza guhatira abaturage gucana amatara yo hanze nijoro. Kabihinduye itegeko, utabikoze acibwa amande ya 10.000Frs. Mu mugoroba usanga abamotsi b’aka gatsiko, inkeragutabara n’abakuru b’imidugudu bazenguruka ingo zose, bagenda bakomanga ku mazu yabibagiwe cyangwa ay’abatinze gucana. Nyir’ibyago bahita bamutambikana ngo afite ingengabitekerezo ya jenoside cyangwa ngo yapinze gahunda za Leta.Abana ntibagisubira mu masomo kubera agatsiko

Benshi mu baturage bavuga ko aya mabwiriza yo kubategeka gucana amatara nijoro ari mabi kandi ko abangamiye uburenganzira bwabo bityo akaba akwiye kuvaho. Gucana amatara si bibi, ni byiza rwose buri wese arabyishimira! Ariko ikibazo aho kiri ni uko babitegekwa ku ngufu maze n’uwo umuriro washiriyeho ntahite abona amafaranga yo kugura undi, agacibwa amande! Ese ubwo aba azize kwica amategeko cyangwa aba ahowe ko ari umukene? Ikindi kibangamiye abaturage ni uko hari igihe uba usigaranye akariro gakeya kandi nta mafaranga ufite, ushaka kukarondereza maze ugategekwa kurara ugacaniye inkoramaraso za Kagame zirara zishinze amatwi ku mazu y’abaturage! Abaturage bavuga ko iri cana ryo hanze rituma bemera kubuza abana babo gusubira mu masomo no gukora umukoro (devoir/homework) kugira ngo batabura uwo bacana hanze bikabaviramo gucibwa amande no kugerekwaho ibindi byaha bibacisha umutwe.Umwanzuro: Kagame ndamusaba kwegura

Guhohotera uburenganzira bw’ikiremwa muntu no kutubahiriza amategeko bikorwa n’ingoma ngome ya Kagame bimaze kurenga igipimo. Ntibigikwiye kwihanganirwa na buri wese, ari umunyarwanda cyangwa umunyamahanga. Ku bw’ibyo ibintu bigomba guhinduka vuba bidatinze!

Nk’uko perezida Kagame aherutse kubyivugira ko nabisabwa azabikora, ndamusaba ko niba akunda abanyarwanda, ubuzima bwe n’ubw’umuryango we yahita yegura ku butegetsi nta ngingimira agize! Kwihangana bigira aho bigarukira, igihe cyo kwihangana ku banyarwanda cyararangiye, niba impanuro muhaye adahise ayubahiriza, ntibizagire uwo bitungura abanyarwanda tubabaye kandi dukunda igihugu cyacu nitubyikorera! Rimwe na rimwe iyo ineza inaniranye hakoreshwa inabi! Ese Kagame ni byo arindiriye?

Mutimutuje Amina

i Kigali

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

%d blogueurs aiment cette page :