Imyigaragambyo ya le 6 Mata ni igipimo cy’imyumvire y’Abanyarwanda n’intangiriro y’ubwiyunge nyabwo. Byiringiro Aminadabu.

Dukeneye kumenya ukuri

Nk’umwe mu basomyi b’urubuga Leprophète.fr nakurikiranye impaka hagati w’uwitwa Nkiko wa FDU-MRC na bagenzi be. Reka mpite mvuga ko kubura mu myigaragambyo yo ku ya 6 mata ari ukunyagwa zigahera. Abanyarwanda dukeneye kumenya ukuri ku rupfu rwa perezida Habyarimana, kuko ari rwo mbarutso ya jenoside. Dukeneye kandi guha agaciro abapfanye na we, no gukomeza imiryango yabo. Mbona kandi dukeneye kugira italiki yibukwa y’amahano yagwiriye u Rwanda. Ubundi yakagombye kuba iya 1 Ukwakira 1990, kuko ari bwo inzira y’umusaraba w’Abanyarwanda yatangiye.

Mu bigaragara, igitekerezo cy’italiki yibukwa y’akaga kacu kimaze kwigarurira abantu benshi, baba Abahutu cyangwa Abatutsi. Italiki ya 6 Mata igomba gufatwa nk’ijoro ry’ifatizo(nuit fatidique)  rya jenoside nyarwanda, kuko ari bwo umugambi FPR yacuze mu w’i 1989 (imvugo ya Deo Mushayidi) yatangiye gushyirwa mu bikorwa mu gihugu cyose. Mu ntangiriro Abatutsi bifatanyaga n’abandi kwibuka italiki ya 6 Mata bafatwaga nk’ibiseswa. None buri wese, amaze kwibonera ko iyo Habyalimana aticwa, jenoside itari kuba mu Rwanda. Ni nde rero wungukiye muri jenoside ?   

Urupfu rwa Perezida Yuvenali Habyalimana si kudeta ni igikorwa cy’iterabwoba

Nyuma y’aho raporo ya Trevidic isohokeye, leta ya Kagame yahise yemeza ko ukuri kumenyekanye. Icyakora byahise bihwekera, kuko na bene kwishima babonye ko abanyarwanda batakiri babandi : hasohotse inyandiko nyinshi zanditse neza kandi zigaragaza ubusumbane (déséquilibre) buri muri iriya raporo, ku buryo na Kigali yirinze gukoresha imyigaragambyo y’ibyishimo. Ubundi ntibyari kubura.

Hari impamvu nyinshi zerekana ko Ingabo z’u Rwanda ex-Far zitari ziteguye urupfu rwa Perezida Habyalimana, cyangwa se ngo habe hari agatsiko kashakaga gukora kudeta. Reka tubyibuke.

Perezida Habyalimana Yuvenali yishwe mu gihe cy’amahoro, intambara yarahagaze. Yarasiwe mu ndege ya gisivili we n’abo bari kumwe bose bavuye gusinya amasezerano ya Arusha. Nyuma y’urupfu rwe ubutegetsi bwabuze ubufata, kugeza ubwo hajya gushakishwa Tewodori Sindikubwabo ngo aze ayobore igihugu! Ngo bamukuye i Butare! Iyo haza kuba hari abasirikari bateguye igikorwa cyo kwica Habyalimana, bari guhita batangaza ko bakoze kudeta, bagasesa inzego zose z’ubutegetsi zariho. Ibyo ntibyabaye. Wenda bari no gusobanura impamvu bahisemo guhindura ubutegetsi binyuze mu nzira ya kudeta. Urugero : kumvikana ku buryo butaziguye na FPR cyangwa se guhangana na yo ku rugamba. Ibyo rero ntibyabaye. Bikaba bisobanura ko muri abo basirikare nta n’umwe wari witeguye kuyobora u Rwanda. Nta mugayo kandi, abari mu gihugu bumvaga Amasezerano ya Arusha igiye kuba igisubizo.

Mu yandi magambo, uwishe Habyalimana ni uwashakaga kuburizamo amasezerano ya Arusha, agamije gukoresha intwaro kugira ngo agere ku butegetsi. Uwo se yaba ari Bagosora ? Aho ntiyaba   ari Kagame ? Icyo nzi cyo Bagosora ntiyafashe ubwo butegetsi ! Ababusimbukiyeho turabazi.

FPR ikimara gufata ubutegetsi, yakoreshaga amanama igenda isebya Habyalimana. Bukeye ibonye iyo turufu idafata (mu by’ukuri yavumbuye ko Abanyarwanda batangaga Habyalimana), ihindura imvugo, isigara ivuga jenoside yonyine. None na jenoside bimaze kugaragara ko ari we wayiteguye. Niyo mpamvu ukuri kugomba kumenyekana.

Jenoside nyarwanda yarateguwe

Biragoye kumvisha abari mu gihugu kiriya gihe ko jenoside y’Abatutsi yateguwe n’Abahutu. Dore impamvu : ubwicanyi bwagiye bukura buhoro buhoro. Ndetse mu ntangiriro ahantu henshi, Abahutu bihishanaga hamwe n’Abatutsi, kuko bababwiraga ko hari insoresore ziri kwica abantu, zihorera Perezida Habyalimana. Uko mu gihugu haburaga uvuga ngo nimwunamure icumu, na RTLM ishyushya imitwe, ni ko benshi mu Bahutu bagendaga bishora mu guhiga no kwica Abatutsi. Ariko na FPR aho yanyuraga yagendaga ihatera itabi. Ababishidikanya muzabaze FPR aho abapadiri bose bo muri diyosezi ya Byumba barengeye, munayibaze impamvu yarimbaguye Abahutu muri Komini Giti, kandi yo ubwayo yiyemerera ko “Komini Giti itakoze jenoside”.

Icyakora koko jenoside yarateguwe. Yateguwe n’uwafashe intwaro ngo azanye demokarasi, agamije no gucyura impunzi kandi azi neza ko mu Buganda aho intambara yaturutse, hari kwigirwa ikibazo cy’impunzi z’Abanyarwanda. Yateguwe n’uwashinze radiyo ihabura abahabye ; agatuma insoresore z’Abatutsi bari mu Rwanda zitoroka imiryango yazo bigakurura urwikekwe mu bari basanzwe basangiraga akabisi n’agahiye. Uwo ni nawe wakusanyaga insoresore z’Abatutsi bari hanze y’u Rwanda, akabumvisha ko ngo “Igihe cyo gukiza u Rwanda umwanda” cyageze: Iyo ni imvugo ya Kimenyi Alexandre! Yateguwe n’amashyaka yavukiye mu cyuka cy’intambara, akavuka agendera ku moko n’uturere, maze ba rusarurira mu nduru bakayivangamo kakahava. Yateguwe n’abicaga bamwe mu banyapolitiki bo muri opozisiyo bagamije guteza akajagari mu gihugu. Yateguwe n’uwishe Ndadaye perezida w’uburundi, kuko ibyabaye i Burundi icyo gihe, byabereye Kagame na Bikomagu umwitozo w’ibizabera mu Rwanda Habyalimana niyicwa.

Muri make, jenoside ntiyateguwe mu mpapuro nka yayindi y’Abayahudi, ariko yarateguwe. Urupfu rwa Perezida Habyalimana rwakomye imbarutso, uwateguye jenoside atangira kuyishyira mu bikorwa. Uwo mugizi wa nabi  rero agomba kumenyekana.

Kuki italiki ya 6 Mata igomba kwibukwa?

Imvugo imaze kumenyerwa ngo “Mbere y’indege na nyuma yayo”. Mbere y’indege abitwa “Abanyenduga” bavugaga ko ubutegetsi ari ubw’”Abakiga”. Nabo bakabasubiza ko bagize igihe cyo kubwikubira. Ariko se ko uwakoze kudeta taliki ya 5 Nyakanga 1973 yatangaje ko habaye kudeta idasesa amaraso, abari abategetsi b’icyo gihe barimbaguriwe iki ? Iki kibazo cyakurikiranye ingoma ya Habyalimana, ntekereza ko kiri mu byatumaga yihambira ku butegetsi. Igihe cyarageze “indege iraraswa”. Nyuma y’indege “Abakiga” n’”Abanyenduga” bose babura ihene n’ibiziriko. Ariko n’abari bategereje ihindukira ry’umwami w’umunyiginya baraheba. Intego zanditse za FPR-Inkotanyi zinigirwa mu igi, FPR yose ihinduka Kagame wenyine.

N’ubwo Kagame ntamushima, ariko hari ikibazo kimwe yashubije : ni we mutegetsi w’u Rwanda wenyine uhungwa n’abantu bavuye mu byiciro binyuranye : Abahutu, Abatutsi, Abakiga n’Abanyenduga.  Kagame amaze kumvisha Abanyarwanda ko ubutegetsi bwe budashingiye ku bwoko, ko ahubwo bushingiye ku nyungu ze bwite  n’Agatsiko bazisangiye. Abenshi kandi si Abanyarwanda.

Iriya taliki rero, izatuma Abanyarwanda bose basubiza amaso inyuma bavugire icyarimwe bati : “Dukeneye ukuri. Umwanzi w’umunyarwanda si Umuhutu, si Umutwa si Umututsi. Si n’umukiga cyangwa umunyenduga. Uwatuzaniye aka kaga, dukeneye kumumenya, twese tukamwamagana”.

Ngo Rukokoma aragarutse !

Umugabo Nkiko ngo yanze Habyalimana n’ibye byose, ntashobora kujya mu myigaragambyo ivuga italiki yapfiriyeho! Nakunze gukurikirana ibitekerezo bya Rukokoma (Twagiramungu Faustin) nsanga koko ari we munyapolitiki nyawe. Rukokoma ntiyanga umuntu (Habyalimana, Kagame). Yanga uwigira akagirwamana. Rukokoma ni we munyarwanda wa mbere watinyutse kubwira Habyalimana ati : “Ubutegetsi bwawe bwarananiwe, egura !”. Icyo gihe igihugu cyose cyarahungabanye ngo Twagiramungu yatinyutse! Nyamara indege imaze kuraswa, nta munyarwanda n’umwe wigeze yumva Rukokoma avuga ngo Habyalimana yishwe n’ingabo ze, nk’uko ba Makuza babivugaga, bagamije gukomba imbehe. Vuba aha bwo Rukokoma yaranatinyutse ati : “Sinigeze nifuza ko Perezida Habyalimana apfa bene kariya kageni, n’ubwo twari duhanganye bwose, mu buryo bwa politiki”. Twese turibuka ubwo yari ministri wintebe, akabwira FPR ngo “Twanze ingoyi n’akandoya , none murabigaruye !” Kuba rero ari mu baharaniye kwitabira imyigaragambyo y’uwa 6 Mata, ni ikimenyetso cy’uko ari umugabo urwanira ukuri n’ubutabera mu Banyarwanda.

Abavuga ko Rukokoma yahemukiye u Rwanda ni abatazi uwahemukiye u Rwanda uwo ari we, cyangwa se bakabyirengagiza nkana. U Rwanda rwahemukiwe n’ingoma ya cyami yikubiye byose abaturage bagahinduka abacakara mu gihugu cyabo; ruhemukirwa n’uwazanye ivangura ry’uturere n’amoko; ubu ruri guhemukirwa n’Agatsiko kikubiye byose mu Rwanda, kakaba kari kwicisha abaturage inzara n’andi mabi atagira izina.

Umwanzuro

Italiki ya 6 Matantangiye kuyibonamo imbuto ikomeye cyane y’ubwiyunge bw’Abanyarwanda. Uzaba umunsi Abanyarwanda bo mu moko yose, mu turere twose bazahura, bagahagurukira rimwe nk’umuntu umwe. Bagatera intero ngo : “Dukeneye ukuri”. Bitari ku by’indege gusa, ahubwo ku mateka yacu yose no ku mibereho y’umunyarwanda w’ejo hazaza. Ngo “Utazi icyo ise yasize avuze…”.

Icyaduha ngo kuri iriya taliki n’igice cya Rudasingwa kizaze. Abanyarwanda dukeneye gusabana imbabazi, ariko buri wese yemeye uruhare rwe mu byatugwiririye. Kugira ngo urwo ruhare rujye ahagaragara, tugomba kugira aho duhuriza. Twese nk’abitsamuye, tuzahurire i Paris taliki ya gatandatu Mata. Isake ni yo ngoma. Utazahagera akaba ari mu Rwanda cyangwa ahandi, tuzabe turi kumwe mu mutima.

Byiringiro Aminadabu

 MAGAYANE (mardi, 27 mars 2012 10:42)

ARIKO RWOSE BERNARDIN IYO YICECEKERAKO NTAWARI KUMUKURAMO IRIYA NKURU YUZUMO UBUSWA? KUVUGA NGO INDAGU ZA MAGAYANE ZARARANGIYE HARYA BIBA NISHAKA KUVUGA IKI? URIYA MUHUTU ARI GUHAKIRIZWA KURI NDE? MUMUBWIREKO MAGAYANE YAVUZEKO INDAGU ZE ZIZARANGIRA RWABUJINDIRI YISHWE, ABARI MU BIHOME (GEREZA)BAHUYE N’AKAGA GAKOMEYE, IGIHUGU GITEWE N’INZARA IKOMEYE, ETC. NIZEREKO BERNARDIN ABIZI KANDI NDABONA ABAZI AMATEKA YE BATUBWIYEKO FAMILLE YE IRI HAFI YA YOSE MURI GEREZA.INDAGU ZA MAGAYANE ZIZARANGIRA AMAGI ARI MURI GEREZA AMENETSE! ESE BERNARDIN KO MBONA ARI « UMUHANGA » YATUBWIRA URIYA RWABUJINDIRI UZICWA NA BENE WABO ARI NDE? YAMAZE GUPFA SE? UHHHHHHHHHHHHHHHHHHHHHH

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

%d blogueurs aiment cette page :