ISHYAKA RNC RIFITE MISIYO YO GUSENYA AMASHYAKA YA OPOZISIYO AKORERA HANZE. Kayijuka Martin

Nyuma yo kuba intandaro y’amakimbirane mu ishyaka FDU-Inkingi ryasaga n’iriri ku isonga rya Opozisiyo ikorera hanze, noneho RNC yiyemeje gusenya burundu ishyaka PDR-Ihumure rya Paul Rusesabagina. Ndaryita ishyaka rya Paul Rusesabagina kuko naryinjiyemo ari we nkurikiye, kandi nzi neza ko hari n’abandi barwanashyaka benshi baririmo kubera ko Paul aririmo ! None se kuki RNC ihisemo kurisenya ?

Ubundi RNC yatangiye ivuga ko atari ishyaka , ntawe itabwiye ko ari IHURIRO cyangwa Plateforme abantu bahuriramo bakagaragaza ibitekerezo. Twashyigikiye RNC kuko twibwiraga ko ari « Groupe de pression » yafasha Opozisiyo gushyira igitutu kuri Perezida Kagame n’Agatsiko ke gategekesha u Rwanda igitugu gikarishye kandi kagasahura igihugu mu nyungu zako gusa .

Ubu byamaze kugaragara ko RNC yatubeshye ahubwo ikaba ari ishyaka nk’uko abayobozi bayo Théogene Rudasingwa na Kayumba Nyamwasa badatinya kubivugira ku maradio n’ibitangazamakuru ! Na none kandi biragaragara ko iryo shyaka rifite misiyo yo gusenya andi mashyaka ya Opozisiyo rihereye ku yemeye buhumyi gukorana naryo !

1. Stratégie  ya RNC iteye ite ?

Mu by’ukuri abayobozi ba RNC barifuza kuba ari bo  bonyine bitwa Opozisiyo kuko ahari bumva ari bo BONYINE bashobora gusimbura Kagame !  Ni nayo mpamvu bashaka :

(1) Gucuranurira andi mashyaka ya opozisiyo  muri RNC

(2) Gukoresha abayobozi b’andi mashyaka,babashukisha imyanya y’ubuyobozi muri RNC, kugira ngo bibagirwe amashyaka bahozemo cyangwa se kugira ngo bo ubwabo bayisenyere. RNC ntitinya no kubasezeranya imyanya ikomeye ngo bazahabwa bageze mu Rwanda, mbese nka ya masezerano yari yaragiriwe Seth Sendashonga, Alexis Kanyarengwe, Pasteur Bizimungu….uko byagenze ibara umupfu !

Ng’uko uko FDU-Inkingi yiciyemo ibice hakoreshejwe  Nkiko Nsengimana, ubu intambara ni yose muri FDU. Muri iyi minsi ishyaka rigezweho rikaba ari PDR-Ihumure !

2. Muti byifashe bite ?

Ntiriwe ndondora amateka, tuzi ko ishyaka PDR-Ihumure ryatangijwe taliki ya 17/06/2006 n’abantu barenga 40 : Abari i Washington baribuka ko bari bashyigikiwe n’abari bateraniye i Bruxelles ndetse n’i Paris ! Abo bose ni ba Fondateurs ba PDR-Ihumure.

PDR yemeye kwinjira mu ihuriro rya RNC atari ukugira ngo imirwe bunguri ahubwo icyari kigamijwe kwari ugufatanya n’abandi mu buryo bw’ihuriro(Plateforme).

RNC yarakugendeye ishuka Nyakubahwa Nayigiziki Jerome, wari Secrétaire Général wa PDR-Ihumure, imugira Coordinateur mu ishyaka RNC ! Umuntu umwe yafatanya ate imirimo ikomeye nk’iyo mu MASHYAKA abiri atandukanye ?

Nyuma yo kumuha uwo mwanya , RNC yiyemeje kumwifashisha kugira ngo arindagize ishyaka PDR-Ihumure :

(1)Nayigiziki Jerome arasa n’uwacuranuriye PDR muri RNC

(2)Yakoze uko ashoboye ibikorwa bwite bya PDR birahagarara(bloquer les activités)

(3) Yanze gutumira inama za Comité nyobozi  yemewe n’amategeko .

(4)Yahisemo gutumira mu buryo busa na rwihishwa inama y’urwego rutazwi mu ishyaka yise «  Les membres Fondateurs », kugira ngo bafate imyanzuro ngo yo « guha icyerekezoyo »  ishyaka ryacu !

Dore uko itangazo yanyujije  kuri internet ryavugaga :

« ITANGAZO LITUMIRA INAMA 

Umunyamabanga mukuru w’ishyaka PDR-Ihumure atumije inama y’abarwanashyaka bose bashinze   PDR-Ihumure (membres fondateurs) taliki ya 17/06/2006 i Washington D.C., mu nama idasanzwe kandi yihutirwa izaba ku cyumweru taliki ya 11/03/2012.

Arasaba abarwanashyaka bumva bazaboneka kuli iyo taliki kumwandikira email kugira ngo abamenyeshe code yo kwinjira mu nama n’isaha  izatangilira ho.

Umunyamabanga mukuru wa PDR-Ihumure

Jérôme Nayigiziki,   ( HYPERLINK « http://fr.mc1322.mail.yahoo.com/mc/compose?to=jnayigizik@aol.com » t « _blank » jnayigizik@aol.com;             956 337 7665      ) ».

Kuki ba Fondateurs batatumiwe mu mazina yabo ? Ni uko Jerome Nayigiziki atari abakeneye bose ! Yashakaga ko haza abo we yishakiye, maze mu ibanga, bagakubita ishoka ishyaka ryacu.

Abo yatumiye ni :

*Rubingisa Providence

*Marcel Gatorano

*Christina Mukama

*Pasteur Michel

Uretse Rubingisa Providence  ushinzwe Droit de l’homme muri PDR, hari uwambwira icyo aba bandi batatu  bashinzwe muri PDR-Ihumure ? Ntacyo tuzi . Nyamara nibo biswe ba Membres fondateurs, bityo bafata  ibyemezo bikurikira nk’uko bigaragara muri raporo y’iyo nama :

« IMYANZURO Y’ INAMA YA PDR-IHUMURE

Nk’uko byali biteganijwe, ku cyumweru taliki ya 11/03/2012, hateranye inama idasanzwe y’abashinze ishyaka PDR-IHUMURE iyobowe n’umunyamabanga mukuru Jérôme Nayigiziki. Ku murongo w’byigwa hali ingingo imwe gusa : kwiga ku cyerekezo ishyaka PDR-Ihumure likwiye gufata mu minsi ili imbere.

Nyuma y’ibitekerezo byinshi byatanzwe, abali mu nama bumvikanye ko, hashingiwe ku mategeko y’ishyaka,  umunyamabanga mukuru yazatumiza Congrès national, ikaba aliyo ifata ibyemezo ku byerekereye icyerekezo ishyaka PDR-Ihumure ligomba gufata. Bashyizeho kandi komite izafasha umunyamabanga mukuru gutegura iyo Congrès. Iyo komite igizwe n’abantu bakulikira : Anastase Rekeraho, Célestin Muhindura, Christine Mukama, Clément Muvunankiko, Emmanuel Hakizimana, Marcel Gatorano, Michel Ndahayo, Pio Ngilikilikesha, Providence Rubingisa. Abali mu nama banasabye ko inama zose zo kwiga ibyerekeye imikorere y’ishyaka PDR-Ihumure ziba zihagaze kugeza Congrès iteranye.

Umunyamabanga mukuru wa PDR-Ihumure 

Jérôme Nayigiziki. »

3. Twibaze cyane

Uyu Rubingisa Providence, ni we uhagarariye RNC muri Amerika yose. Ubu amaze iminsi mu Bubiligi aherekeje Rudasingwa Theogène muri misiyo yo gutongoza Abahutu ngo basenye amashyaka yabo maze nk’umukumbi w’intama bayoboke ishyaka RNC ngo rifite ingufu zo gukuraho Kagame !

Namwe mundebere da : ngo uyu Providence niwe ugomba kwiga icyerekezo  kigomba guhabwa ishyaka PDR-Ihumure ? Ubwo se ntibivuga ko iri shyaka ryarangije guteshwa umurongo ? Jerome araryerekeza he handi uretse muri RNC nayo ubwayo ishobora kuba itazi neza aho igana ?

Umwanzuro :

Amashyaka ya Opozisiyo yitondere RNC! Abayobozi bayo bafite amayeri menshi! Igomba kutubwira neza uwo ikorera! Nihatabaho ubushishozi, intambara zigiye kuba nyinshi muri Opozisiyo ikorera mu mahanga!

Ni nde uzabyungukiramo ? Ni Paul Kagame n’Agatsiko ke.

Ni nde uzabihomberamo ? Ni rubanda iri ku ngoyi mu Rwanda.

Ubwo se RNC ikorera nde….? Buri wese yakwisubiza.

Kayijuka Martin,

Umurwanashyaka wa PDR-Ihumure.

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

%d blogueurs aiment cette page :