HYPERLINK « http://www.leprophete.fr/2011/08/06/cyangugu-bugarama-abahinzi-b-umuceri-baratabaza-leta-y-urwanda-ishyigikiye-abatekamutwe-bariho-kwambura-ku-ngufu-abaturage-imirima-yabo-bwite/ » l « permalink » o « Lien permanent vers Cyangugu-Bugarama : Abahinzi b’umuceri baratabaza ! Leta y’Urwanda ishyigikiye abatekamutwe bariho kwambura ku ngufu abaturage imirima yabo bwite ! » Cyangugu-Bugarama : Abahinzi b’umuceri baratabaza ! Leta y’Urwanda ishyigikiye abatekamutwe bariho kwambura ku ngufu abaturage imirima yabo bwite !

Akarima k’umuceri ni yo yari zahabu ya nyirako. None Abatekamutwe bambuye abo baturage bo mu Bugarama ayo mahirwe !

1.Muti byagenze gute ?

Muri aya mezi abiri ashize (Kamena-Nyakanga 2011), abahinzi b’umuceri bo mu Bugarama bagushije ishyano. Hadutse abajura baturutse i Kigali, bereka abaturage ko batumwe na Leta y’Urwanda kubarura imirima y’umuceri yo mu gishanga cya Bugarama, kumenya ba nyirayo no « kuyisaranganya abaturage » !

Ubwo rero bahutse muri iyo mirima bayitera imirwi, benshi mu bari bifitiye imirima biguriye amafaranga yabo basanga bakuwe no kuri liste nshya , abandi bakamburwa imirima myiza kandi yera bari basanganywe bakabashukisha uturima tw’urusekabuye tudafite amazi cyangwa tutigeze tunahingwamo umuceri !

Ingero ni nyinshi : Uwo bita Muganga Bosiko w’i Mushaka yari yifitiye imirima ye 4, yose barayimwambuye asigara amara masa ! Urundi rugero rugaragaza neza ukuntu Leta idashaka cyangwa se itagishoboye kurengera inyungu z’umuturage ni Umugabo witwa RUDAKUBANA. Uyu mugabo yagurishije inka ze zose yigurira imirima 100 y’umuceri, maze si ukuyimwambura yose, bamushumbusha uturima tubiri tudafatitse nuko bimuyobeye arivumbura aratwanga !

Reka twibutse ko umurima umwe uhingwamo umuceri ugura ibihumbi 600 by’amafaranga y’Urwanda (600 000fr). Ni nde utakumva igihombo bwana RUDAKUBANA asigayemo : (100×600 000 =60 000 000) : Miliyoni mirongo itandatu z’amafaranga y’Urwanda zikubiswe n’inkuba ! Ubwo se uyu mugabo azamera ate ? Umugore we n’abana be bazatungwa n’iki ? N’abandi baturage amagana bambuwe uturima twabo bamerewe nabi cyane, bararira ayo kwarika!

Twibutse na none ko muri kariya karere ka Bugarama, kugira akarima k’umuceri ni ryo shingiro ry’ubukungu. Benshi mu baturage bashishoza bagurishije indi mitungo yababeshagaho kugira ngo bagure uturima two guhingamo umuceri. Iyo ufite uwo murima ushobora kuwuhinga cyangwa ukawukodesha, bikakwinjiriza udufaranga. Kuva kiriya gishanga cya Bugarama cyatangira guhingwamo umuceri , Leta ntiyigeze ibwira abaturage ko kugura umurima mu gishanga ari icyaha gihanwa n’amategeko ! Ahubwo abagize umurava bakagura imirima bakanayihinga neza bagiye bahabwa agahimbazamuskyi ! None ishyari ry’Abajura baturutse i Kigali rigiye gusiga abo baturage iheruheru, Leta irebera!

2.Kuki Leta ya Paul Kagame ireka abajura bakikorera ibyo bashatse, bakarenganya abaturage bene aka kageni ? Niba igihugu cyacu kikigira abayobozi, bashinzwe iki niba batabona ko abaturage barengana bigeze hariya ?

Ayo mabandi yambuye abaturage ibyabo ngo yavugaga ko ariko amategeko mashya y’Urwanda ateganya ibyerekeye imirima mu Rwanda. Ngo nta munyarwanda ukigira umurima we bwite, ngo isambu yose ni iya Leta , ngo by’umwihariko ibishanga byose ni ibya Leta.

Muri ayo mabandi nta wigeze asomera abaturage ingingo n’imwe y’iryo tegeko ribambura ibyabo. Ntabwo umuyobozi w’Intara y’Uburengerazuba yigeze amanuka ngo asobanurire abaturage ayo mategeko mashya kandi ngo abateguze ko bagiye kwamburwa imirima bagokeye , ikaba ariyo yari ibatunze !

Icyo tutagomba kwirengagiza ni uko hariho amahame akomeye y’uburenganzira bwa muntu na Leta y’Urwanda yemera : Kugira icyawe utunga(propriété) ni bumwe mu moko 4 y’ uburenganzira umuntu avukana butagibwaho impaka: «Ces droits sont la liberté, la propriété  », la sûreté et la résistance contre l’oppression » (art.2 DDHC) . Bityo rero kwanga akarengane no kurengera umutungo wawe ni inshingano ikomeye ya buri munyagihugu. 

Leta y’Urwanda nta burenganzira na mba ifite bwo kwambura umuturage umutungo we yaruhiye nta mpamvu igaragara. Kwamburwa isambu bishoboka gusa iyo hari igikorwa cy’inyungu rusange giteganywa gukorera muri iyo sambu, kandi umuturage wimuwe mu isambu ye ahabwa ingurane ikwiye kandi iteganywa n’itegeko. Kwambura umuturage isambu ye ku ngufu igahabwa undi utarayigokoye ni akarengane, ni ubujura bubi kabone n’aho bwaba bushyigikiwe na Leta.

Muri make Abaturage basigaye bameze nk’intama zitagira umushumba , ikirura cyose kiraturuka i Kigali kikaza kikazirohamo kigakebagura uko kibyumva !

3. Dore icyerekana ko uko kwambura imirima abaturage bitakozwe mu rwego rwo gukurikiza amategeko y’igihugu ahubwo ari ubujura bubisi :

(1) Imirima ntiyambuwe abaturage ngo ishyirwe mu mutungo wa Leta, cyangwa se ikorerwemo igikorwa cy’inyungu rusange.

(2) Imyinshi mu mirima yambuwe abaturage yatwawe n’abantu batazwi badatuye no mu Bugarama. Abo se nibo bitwa Leta ?

(3) Iyo mirima ngo yaba yaratwawe n’abasilikari bakuru b’inda nini bifuje gutunga iyo mirima batagombye kuyigura , bahitamo kuyambura abaturage ku ngufu. Ubutaha tuzabagezaho y’amazina y’abo bajura.

(4) Igishyirahamwe baringa cyitwa RADA cyatwikiriye ubwo bwambuzi cyahise giseswa kitamaze kabiri kugira ngo abaturage bambuwe imirima yabo bazahere mu gihirahiro babure aho babariza ibyabo.

(5) Nta Muyobozi (w’Umurenge, Akarere, Intara, Goronome……) wigeze atabaza inzego z’ubuyobozi bw’igihugu ngo yerekane akarengane abaturage bari kugirirwa.

(6) Uwagerageje kubyitambikamo gato ni bwana Turatsinze Jean Pierre wahoze ari Meya wa Bugarama kandi tuzi ko aherutse kwicwa azira icyo kibazo. Ndetse bimaze kumenyekana ko hari n’abandi baturage bari kubigwamo.

Ibi byose byerekana ko : nta shiti, bamwe mu bayobozi bakuru bo muri Leta ya y’Urwanda babiri inyuma ! Bitabaye ibyo Minisitiri ushinzwe iby’ubutaka na Minisitiri w’ubutegetsi bw”igihugu bakagombye kurenganura aba baturage bafite umujinya mwinshi baterwa n’ako karengane bagiriwe.Tukaba tubona neza ko ibi bishobora gukurura umwiryane abaturage bakaba batemana.

4. Ibibazo umuntu wese yakwibaza:

Abaturage bakwiye gusubira mu mirima yabo bakayihinga, uwayibambuye yababara akaba ari we urega mu bucamanza !

(1) Leta y’Urwanda yaba isigaye igendera ku mahame ya Gikomunisti ngo bityo tumenye ko nta muturage ukigira icyo atunga cye bwite (propriété privé)?

(2) Niba se Leta yacu isigaye ari iya gikomunisti kuki igaburira agatsiko k’abantu bake abandi baturage ikabambura ibyabo ubundi ikabareka bakicwa n’inzara ?

(3) Niba « Gusaranganya » bibaye itegeko-ngenderwaho mu gihugu (byaba ari byiza cyane rwose !!!) kuki hasaranganywa gusa amasambu y’abaturage(b’abakene !) ntihasaranganywe indi mitungo nk’amafaranga y’abaherwe batunze menshi bibereye mu mutamenwa i Kigali?

(4) Iyo Leta yicecekeye abaturage barengana bigaragaza iki ?

Ibisubizo :

(1) Leta y’Urwanda ntigendera ku matwara ya gikomunisti, ntaho bigaragara mu Itegekonshinga no mu yandi mategeko igenderaho.

(2) Ariya matwara tubona ni ay’Abajura bitwikira Leta bashaka kwigarurira umutungo wa rubanda batawuruhiye.

(3) Ririya « saranganya ridasobanutse » rikorwa ku mitungo y’abakene gusa rihishe politiki mbi yo kwikubira ibyiza by’igihugu mu gihe abakene bamburwa utwabo tukongerwa ku mitungo y’abaherwe bari ku butegetsi, biganjemo abasikari bakuru bavuga rikijyana.

(4) Leta ishyigikiye abo bajura kuko iramutse itabashigikiye yabahana by’intangarugero.

(5) Ariko rero Leta ishobora no kuba itinya abo bajura kuko yenda bayirusha ingufu.

Icyo gihe byaba bisobanuye ko Leta itagifite ubushobozi bwo gutabara abaturage. Biramutse ari uko bimeze ubwo abaturage bakwisuganya bakiga uburyo bwo kujya birwanaho, bo ubwabo.

UMWANZURO

Inama ngira abaturage bambuwe imirima yabo:

Itegeko cyangwa Ibwiriza rirenganya rubanda si itegeko rikwiye kwemerwa no kubahirizwa, mukwiye kurisuzugura nta kundi kugisha umutima inama! Nimusubire mu gishanga cya Bugarama, musubirane imirima yanyu mwahoranye, muyihinge ntacyo mwikanga. Abo bandi bihaye kuyibambura ku ngufu nibayigarukamo muzisuganye mubafate, mubasubize kuri gahunda, noneho abe aribo bazajya kubarega mu nkiko , isi yose irebe icyo bashingiraho bayiburana! Yenda icyo gihe ukuri kose kwazajya ahagaragara tukamenya n’uwatanze “itegeko” ryo kubambura ibyanyu uwo ari we! Mwigira ubwoba, kutivumbura ku kibazo nk’iki byaba bivuga ko mutakiri abantu batekereza, ko mwahindutse udusimba tutagira ubwenge ayo mabandi ahonyora uko yishakiye!

Inama ngira Perezida wa repubulika Paul Kagame:

Abaturage bo mu Bugarama bambuwe imirima yabo bararakaye cyane kandi bakeneye ko ubarenganura. Kereka niba muri iyo mirima yambuwe abaturage hari iyo nawe ubwawe wafashemo, dore ko abo bajura batabuze guhwihwisa ko ari wowe uba wabatumye! Niba utabifitemo uruhare, umenye ko yenda ababikoze bafite gahunda yo kuguteranya n’abaturage ! Nudahana abo bajura ngo urenganure abarenganijwe, uzaba ubaye Perezida w’Abajura, abo baturage ntacyo muzaba mugipfana ! Uru rubanza ko ari urucabana, wowe rwakunaniza iki ?

Padiri Thomas Nahimana.

Tel :            0033647434465      .

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

%d blogueurs aiment cette page :