Uhishira umwanzi akakumarira abana. Ubuhamya bw’impunzi yo muri Zambia. Pierre Tubanambazi(source: www.leprophete.fr)

Aragowe, uwateje aka kaga Abanyarwanda bakirimo. Icyajyaga kuruta ni uko atari kuvuka.

Impunzi za mbere z’Abanyarwanda zo muli 1994 zatangiye kugera muli Zambia muli uwo mwaka guhera nyuma y’aho Perezida Habyarimana na Ntaryamira bamaze kwicirwa i Kigali.

Jye nageze muli Zambia nabanje kunyura muli Zaire, yaje kwitwa nyuma Republika Iharanira Demokrasi ya Congo. Iyi Zambia nyigereranije n’u Rwanda rw’ubu na Repubulika Iharanira Demokrasi ya Congo, nsanga Zambia ali Paradizo. Abantu bazavuga bati nuko nta kindi gihugu kindi wigeze ubamo. Sibyo aliko, kuko nabaye no mu Rwanda rundi rutagira aho ruhuriye na gato n’uru Rushyashya.

Impunzi zigeze muli Zambia zakiranywe ubumuntu. Ntaho bihuriye no muli Congo aho zamburwaga n’abasilikari baho. Babyitaga “gucurika”, kuko iyo bakwamburaga nta nabusa bagusigiraga, baragucurikaga nkucurika umufuka w’ibigori agakunkumura. Cyakora ntawe bicaga; kwica babyigishijwe n’inkotanyi za Kagame. Mubageze muli Zambia barize, abatari bake muli bo baje kubona akazi muli Leta cyangwa se ahandi babaga babakeneye. Abandi kandi bagerageje kwirwanaho nta nkomyi mu bucuruzi bugufi gufi kugira ngo bashobore kubaho; abasigaye bahawe imirima n’ibikoresho barahinga.

Ubwo aliko Inkotanyi za Kagame zimaze kubona ko abazihunze bagihumeka zitangira kohereza muli Zambia abantu bazo bazaga basanga abandi bazo bari basanzwe bakora mu biro bya COMESA, balimo uwitwa NTAMWEMEZI. Ubwo ingoma ya Kagame iba itangiye kotsa igitutu Guverinoma ya Zambia ngo icumbikiye abicanyi. Ubwo Urukiko rwa Arusha narwo ruba rumaze gushyirwaho: abaporokireri, abajuji, abavoka n’abandi bakozi b’urwo rukiko bategereje inzirakarengane za mbere bagiye kuriraho.

Mbere y’aho, icyo bitaga Projet San Francisco i Kigali cy’Abanyamerika cyakoraga ubushakashatsi kuli Sida cyaje kwimurirwa i Lusaka by’agateganyo, kijyana n’abakozi bamwe cyari gisanzwe gikoresha i Kigali bali bamaze kuba impunzi.

Ahahera mu kwa Nyakanga 1995, twumva ngo umuganga n’umuforomokazi b’impunzi bakoraga muli iyo Projet n’imiryango yabo: nukuvuga umugore w’uwo muganga n’abana babo hamwe n’umugabo w’uwo muforomokazi n’abana babo, binjijwe mu ibohero bose. Abantu turumirwa!

Ngo bivuye kuki? Ba bakozi ba Kagame i Lusaka bahimbye inyandiko y’iterabwoba ku buzima bw’Umunyamerikakazi wategekaga iyo Projet, bayitirira izo mfungwa mbere y’uko zifungwa, bayoherereza uwo munyamerikakazi wari wibereye mu biruhuko iwabo muli California muli Leta Zunze Ubumwe z’Amerika. Ubwo uyu munyamerikakazi amaze kubona iyi nyandiko , yahise amenyesha Guverinoma ya Zambia ko niba idafashe abo bantu ngo ibamukize, Projet agiye kuyifunga. Guverinoma ya Zambia nayo, nubwo yashidikanyaga ku kuri kw’iyo nyandiko , ibonye ko abaturage bayo bali bamaze kubona akazi muli iyo Projet bagiye kukabura, ihita ifata izo nzirakarengane, izikubita mu munyururu. Cyakora byageze aho, nyuma y’uko impunzi n’abandi bantu bumva ukuri bamaze gusakuza, ba bana baza kurekurwa, hasigara mu munyururu ababyeyi babo.

Hagati aho impunzi zitangira gushaka avoka uzaburanira izo mfungwa. Nkaba mboneyeho kubabwira ko muli ibyo bihugu bitatu nabayemo , Zambia yonyine niyo nabonye ifite Ubucamanza bwigenga.

Hali nko mu kwezi k’Ugushyingo 1995, tubyutse mu gitondo, twumva ngo muli ilyo joro lyakeye haraye hafashwe impunzi zindi zigera kuli 18 muli Lusaka yose. Abo 18 basangishijwe babandi 4 bari basanzwe mu munyururu. Muli abo bafashe halimo abarimu bigishaga muli Universite na College by’i Lusaka, halimo abaganga n’izindi mpunzi zikoreraga ku giti cyazo.

Ilyo fatwa ly’abo bantu bose, lyongereweho n’ilya baliya bandi tutali twamenyera impamvu, lyatumye impunzi zishira ubwoba. Twarahagurutse twese abana, abagore n’abagabo tujya ku biro bya HCR i Lusaka, dusaba kubonana n’Umukuru w’Ishami lya Loni lishinzwe iby’Impunzi muli Zambia (HCR). Nibwo yakiriye delegation yacu y’abantu bake bamugezaho impungenge dutewe no kutamenya impamvu bagenzi bacu baliho bamanurwa mu munyururu, nawe abwira abo twatumye ko nawe agiye guhamagara mugenzi we ushinzwe iby’impunzi muli Ministeri y’Ubutegetsi bw’Igihugu, witwa Mwaba, kugira ngo icyo kibazo bakigire hamwe kandi bashobore kuduha igisubizo uwo munsi. Natwe twarategereje kugeza igihe Mwaba aziye. Baragiye bariherera, hanyuma baza kubwira imbaga yali ibategereje ko ikibazo bacyakiriye kandi ko nabo bagiye kukigeza ku bategetsi bo hejuru.

Ibisubizo twabibonye bukeye mu binyamakuru bya Leta bavuga ko abo bantu bose binjiye mu gihugu ku bulyo bunyuranyije n’amategeko yabo kandi ko haliho n’ibindi byaha bakoze bakurikiranweho; aliko ibinyamakuru ntibivuge ubwoko bw’ibyo byaha bindi. Nyamara abo bantu bose Guverinoma ya Zambia yari yarabahaye impapuro z’ubuhungiro imaze kubyumvikanaho na HCR, bali bafite yewe n’impushya zo gukora. Aliko ibyo byose bali barabibambuye mbere yo kubafunga. Ubwo wa Avoka impunzi zari zarashakiye babandi 4 bambere ziba zimwongereho na babandi 18. Cyakora uwo Avoka, niba nibuka neza witwa Lisulu, asa nk’aho ako kazi yemeye kugakorera ubuntu kuko yali umuntu ugira impuhwe, akaba yarabonaga impunzi ziriho zirengana.

Amarira y’aba bana b’impunzi z’Abanyarwanda nayo agera mu ijuru!

Ubwo izo mpunzi zamaze amezi n’amezi mu buroko. Bukeye Arusha yari irekereje, itegereje inzirakarengane za mbere ijya gufunga, iba iraje ifashemo 3 bambere bagiye gukingurirwaho uburoko bwa Arusha. Ubwo abagiye gutungwa no gushinyagurira Abahutu, babacira imanza z’ibyaha batigeze bakora, baramwenyura. Ubwo igihugu cya Mwalimu Julius Nyerere, wafashije Paul Kagame muguhekura u Rwanda, kiba kibonye inyiturano itagira uko isa: Arusha yari yarubakiwe kuba Umurwa Mukuru wa East African Community igihe cya Kenya ya Kenyatta, cya Uganda ya Obote na Tanzania ya Nyerere. Iyi Community yaje gusenyuka igihe cya Idi Amin wa Uganda, maze amazu yawo atahwa n’ibihunyira. Abagerayo ubungubu bavuga ko, kubera amadolari ya Amerika atabaritse amenwa mu isoko mpuzamahanga ly’ibinyoma, TPIR, Arusha ali umugi ukataje; banavuga ko yaba aliyo yabaye Umurwa Mukuru wa Tanzania. Izo mfungwa 3 lero zalimo nyakwigendera George Rutaganda wali visi-presida w’Interahamwe zishinjwa kuba zarakoze jenoside y’Abatutsi kandi zigashinjwa n’uriya bizwi neza ko ariwe wayiteguye kandi akaba utunzwe nayo, halimo nanone Jean Paul Akayezu w’umututsi ngo nawe waje gukora genocide y’abatutsi bene wabo da! Tanzania ya Mwalimu Julius Nyerere nayo yaje gushimira Paul Kagame na FPR ye icyo gikorwa cy’ingenzi imwoherereza ku ngufu ibihumbi amagana n’amagana by’Abahutu bari barahungiyeyo, kugirango abakarabe inkaba bose uko bakabaye.

Ubwo lero Kagame nawe ati baliya basigaye mu munyururu i Lusaka ntibagomba kunshika. Nta byera ngo de! Intumwa za Kagame zaje kumvikana na bamwe mu bategetsi ba Zambia ko Kigali yohereza indege i Lusaka bagafata ba banyururu bakabajyana buzigo (nk’imizigo) ku kibuga k’indege ikabatahana i Kigali. Uwo mugambi mubisha aliko waje gupfuba kuko avoka w’imfungwa yaje kuwutahura hakiri kare, maze awushyira ku karubanda.

Nyuma y’ibyo noneho, Avoka w’imfungwa yaje kujya

kuburana na Leta mu rukiko rw’i Lusaka; agaragura Leta. Urukiko rutegeka ko imfungwa zose zirekurwa, zigasubizwa ibya ngombwa byazo by’ubuhunzi zali zahawe, niba halimo n’izitarabibona zikabihabwa, kandi n’abari bafite akazi muli Leta ikakabasubiza. Amategeko y’Urukiko yarubahirijwe.

Nyuma y’aho, naje kwimukira mu wundi mugi wa Zambia kubera ko nabonaga Intore za Kagame zimaze kuba nyinshi i Lusaka. Cyakora amakuru ya Lusaka nakomeje kuyakurikiranira kure.

Ahahera muli 1997, twumva ngo Anyesi Ntamabyariro, umugore wa Dr Rutagwera, akaba yarahoze ali Ministri mu Rwanda, Intore za Kagame zamugejeje mu buroko i Kigali; Intore ziranabyigamba rwose.

Dr Rutagwera yari amaze igihe kitari kinini yimuriwe mu bitaro bya Zambia biri hafi y’umupaka wa Zambia na Provinsi ya Lubumbashi ya Republika Iharanira Demokrasi ya Congo. Intore ngo zaje mu rugo rwa Dogiteri ziyambitse imyenda ya gipolisi cya Zambia, zisanga umugore ali wenyine mu rugo, zimubwira ko ngo Polisi y’aho yasanze hali impapuro atasinye, ngo bakaba lero bari baje kumujyana ngo azisinye. Anyesi yemera ibyo Intore zimubwiye, zimukubita mu mudoka. Kuva icyo gihe umulyango we ntiwongeye kumuca iryera.

Ubwo abakozi ba Kagame bakomeje kubuza impunzi z’Abahutu amahwemo kuburyo bwinshi bunyuranye. Bajya muli HCR kuzibangamira ngo bazibuze kujya gutura mu bindi bihugu byo hanze byaba biramutse bishaka kuzakira, ngo ahubwo HCR na Guvernoma ya Zambia nizibacyure ku ngufu mu Rwanda “rutemba amata n’ubuki”! Ahubwo abo bakozi ba Kagame bakajya kuzana bene wabo bali muli Congo no mu Rwanda bakaba ali bo boherezwa mu bihugu byo hanze mu mwanya w’impunzi z’Abahutu.

Muli 2007, muli Lusaka haduka ubwicanyi bukabije bwibasiriye impunzi zageragezaga kwirwanaho mu bucuruzi. Bugacya abantu bakumva ngo kanaka abantu bamusanze mu kaduka ke bamukubita isasu basiga intumbi aho, barigendera nta n’ikintu batwaye. Polisi ya Lusaka nayo ibyo bintu bitangira kuyitera impungenge, itangira gukora iperereza lyayo, iza kugwa ku uwitwa Achille BIZIMANA wiyitaga impunzi kuva kera. Polisi yasatse aho uyu muntu yabaga, imusangana impapuro zerekanaga ko buli kwezi yajyaga i Kigali mu manama HCR na Guvernoma ya Zambia batabizi, isanga afite amalisti ya ba bantu bishwe n’abandi bagombaga kubakurikira n’ibindi bikoresho by’ubugizi bwa nabi. Achille yafunzwe hafi umwaka muli Zambia, hanyuma Guvernoma ya Zambia imwirukana ku butaka bwayo. Yasubiye i Kigali. Nubwo mission ye yose itari irangiye, yagiye amaze kwica no kwicisha impunzi zigera ku icumi gusa kandi intego yali ukuzimara zose. Yagezeyo aragororerwa, ubu araryoshe cyane i Kigali.

Kuva aho Achille BIZIMANA amaze kwirukanwa muli Zambia nta mpunzi yongeye kwicwa kaliya kageni kugeza mu mezi ashize aho Intore zashatse gushimuta impunzi y’umucuruzi yitwa Gaspard Twahirwa ngo zimujyane i Kigali urwa Madamu Anyesi Ntamabyariro cyangwa se zimwicire mu nzira. Cyakora Imana yaje gukinga akaboko.

Kagame na n’ubu arakomeza kohereza Intore ze ino, zasubira i Kigali akajya kuzakirira mu Rugwiro azita, nazo kandi ziyita, intumwa z’impunzi zo muli Zambia, Malawi, Congo Brazzaville n’ahandi. Izo ngirwa-mpunzi zigatangaza ko izindi mpunzi ngo zajyaga zitera izo ntore ubwoba ngo zivuga ko mu Rwanda hatameze neza, ngo noneho zirahigereye zisanze u Rwanda ali Paradizo! Muzambwire neza niba hali umuganga w’impunzi witwa Speciosa Uwitegereje twigeze twohereza mu Rwanda ngo ajye kutuvuganira? Niba se anabaho , naze asobanurire impunzi ibyo yabonye byiza byo mu Rwanda rwa Paul Kagame.

N I D U K A N G U K E !

Dore hamwe mu ho imigambi yo kuturimbura iculirwa hano muli Zambia. Ni kwa :

-Abdul KALIMU: uyu mugabo ni mwene wabo wa Paul Kagame wafashe ubwenegihugu bwa Zambia, akaba ali umucuruzi.

-Dogiteri

BUGIRIMFURA wiyita impunzi.

-Aloys NYAGASAZA: uyu ahemberwa kwinjiza mu butore urubyiruko rw’impunzi zali zisanzwe muli Zambia.

-COMESA: iyi yo yabaye Ambasade ya Kagame muli Zambia kuva kera.

Nkaba nsaba impunzi z’Abanyarwanda ziba mu bindi bihugu zibishoboye ko zaburira bagenzi babo babinyujije kuli uru rubuga rwashyiriweho abatagira aho bavugira. Nkaba nsaba ufite amahirwe yo kugera kuli internet , haba hano muli Zambia, haba ahandi hatari benshi badafite ayo mahirwe, ko yacapa iyi nyandiko akayereka abandi.

Ubona kandi ko naba narateshutse cyangwa se ko haba hali icyo nibagiwe nagishyire kuli uru rubuga.

Pierre Tubanambazi

Zambia

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

%d blogueurs aiment cette page :