Mgr Dominiko Ngirabanyiginya yatabarutse.

Dominiko

Inkuru yasakaye ku isi hose muri iki gitondo ni uko Mgr Dominiko Ngirabanyiginya yaraye yitabye Imana mu ijoro ryakeye.

Mgr Dominiko Ngirabanyiginya yavukiye muri Paruwasi ya Kabgayi muri Diyosezi ya Kabgayi mu 1937; atangira iseminari nto mu 1952, ahabwa ubupadiri mu 1964 nyuma aza kuba umurezi mu iseminari kuva mu 1967.

Nta wize mu Seminari nto ya Nyundo guhera mu 1967 washobora kuba yaribagiwe Mgr Ngirabanyiginya Dominiko. Nanjye nagize amahirwe yo kubana na we imyaka  itandatu yose yose kuva mu 1986 kugera mu 1992.

Uyu mubyeyi ntiyari umupadiri usanzwe gusa, yari « un  vrai mythe ». Abarezwe na we bashobora kumuvuga ku buryo butandukanye ariko bose bahuriza ku kuba yarashoboye kubacengezamo indangagaciro eshatu zikunze gutabara abazikomeyeho : la Ponctualité(kugerera igihe aho ugomba kuba); le Silence ( kumenya guceceka kugira ngo ushobore gutega amatwi), la Rigueur( gukorana umwete kandi utajenjetse).

Mu gihe cyacu Dominiko Ngirabanyiginya yatwigishije amasomo y’Ikilatini, Muzika na Esthétique : ntiwashoboraga kuyatsinda utafashe umwanya wo kuyiga bihagije. Ng’uko uko yadutoje gukunda umurimo ukoze neza.

Abashoboye kwegera  cyane Mgr Dominiko Ngirabanyiginya  afite ukuntu yabahumuriraga impumuro isa na » tremendum »(akoba) ariko  ikajyana na « fascinans » (kugukwega no kugutera amatsiko yo kumumenya kurushaho)! Niyo mpamvu  bamwe bazakubwira ko bamutinyaga cyane ariko abandi bakavuga ko bamwiyumvagamo cyane. Ntawamugezeho atasigiye akantu azajya amwibukiraho (marquer l’esprit) !  Nta wamumenye ushobora kumwibagirwa.

By’umwihariko, iyo warangizaga amashuri mu Seminari ya mutagatifu Piyo wa 10 yo ku Nyundo nyuma ugasubirayo ugiye kuhasura  , ntawe utaratangazwaga (être touché) n’urugwiro, ibyishimo n’icyubahiro Dominiko Ngirabanyiginya yakwakiranaga .  Mu by’ukuri abo yareze barushagaho kumukunda nabo bamaze kuba abagabo, nibwo biyumvishaga ukuntu yabafashije kuba « abagabo bihagazeho ».

Hari ubwo nicara , ngasuzuma zimwe muri « réactions » zanjye, ngatangazwa n’ukuntu mu bumuntu bwanjye bw’imbere (conscience) Dominiko Ngirabanyiginya afite akantu yatebejemo. Hari na bagenzi banjye benshi bajya bambwira ko ariko bibagendekera !

Mgr Dominiko Ngirabanyiginya yari umupadiri w’umuhanga n’intwari.

Mbega ukuntu nifuzaga kuzongera kumubona no kuganira nawe . None adusize tukimukeneye. Tuzahora tumwibuka. Imana yihanganishe umuryango we.

Nk’uko Dominiko Ngirabanyiginya yakundaga guherekeza abatabarutse muri Liturjiya nziza, tubaye twifatanyije n’abazamuririmbira indirimbo nziza z’Ikilatini zo kumusezeraho.

In Paradisum deducant Angeli ,

In tuo adventu suscipiant Martyres,

Et perducant te in civittem sanctam Jérusalem,

Chorus Angelorum te suscipiat,

Et cum Lazaro quandam paupere,

 Aeternam habeas requiem.

Mana muhe iruhuko ridashira,

maze umwiyereke iteka,

aruhukire mu mahoro.

Umwe mu bo wareze,

Padiri Thomas NAHIMANA.

In POLITICS  

Laisser un commentaire

Votre adresse de messagerie ne sera pas publiée.