DUSANGIRIJAMBO: Induru iterwa n’Abanyarwanda bicwa n’inzara imaze kuba ndende, ngiye kumanuka ndebe ibyayo….!

cropped-images.jpg

I. Isomo ryo mu gitabo cy’Intangiriro 18, 20-32

Abashyitsi batatu ba Abrahamu bari bagiye kujya muri Sodoma. Nuko Uhoraho aravuga ati “Induru iterwa na Sodoma na Gomora imaze kuba ndende, n’icyaha cyabo kirakabije ! Ngiye kumanuka ndebe niba iby’induru yangezeho ari ko babigenjeje koko. Niba atari byo kandi na byo mbimenye.” Ba bagabo bagenda berekeje i Sodoma, Abrahamu we akomeza guhagarara imbere y’Uhoraho.

Abrahamu aramwegera ati “Koko ugiye kwica intungane hamwe n’umunyabyaha ? Hari n’aho wenda haboneka abantu mirongo itanu b’intungane mu mugi ! Ubwo se koko warimbura uriya mugi ? Ntiwababarira hariya hantu ugiriye izo ntungane mirongo itanu ? Uramenye ntukabigenze utyo, ngo wice umunyabyaha hamwe n’intungane ; intungane zaba zipfuye urw’abagome. Ntibikabeho ! Ucira imanza isi yose ntakarenganye !” Uhoraho ati “Ninsanga muri Sodoma hari intungane mirongo itanu nzahagirira imbabazi, nzahasonera kubera izo ntungane mirongo itanu.”

Abrahamu ati “Jye mukungugu, jyewe w’ivu, nongeye kuvugisha Databuja. Za ntungane mirongo itanu nihaburamo eshanu, bizatuma usenya uriya mugi wose ?” Uhoraho ati “Nimpasanga intungane mirongo ine n’eshanu sinzahasenya.” Abrahamu ati “Ahari wenda haboneka mirongo ine !” Uhoraho ati “Sinzawusenya ngiriye abo mirongo ine.” Abrahamu ati “Databuja ntarakare, nongeye kubaza : ahari wenda haboneka mirongo itatu ?” Uhoraho ati “Sinzawusenya ninywusangamo mirongo itatu.” Abrahamu ati “Nongeye kwiyemeza kubaza Databuja : ahari wenda haboneka makumyabiri ?” Uhoraho ati “Sinzahasenya nihaboneka makumyabiri.” Abrahamu ati “Databuja ntarakare, reka noneho mvuge ubwa nyuma : ahari wenda haboneka icumi gusa.” Uhoraho ati “Sinzahasenya ngiriye abo icumi.”

II.Tuzirikane

Tugeze ku cyumweru cya 17 mu bisanzwe by’ umwaka C. Dushobora kwakira neza ubutumwa bwa Liturjia y’uyu munsi duhereye kuri iri somo ryo mu gitabo cy’intangiriro dusomerwa mu misa zose z’uyu munsi.

1.Buri wese niyumve ko umujyi cyangwa igihugu cyose kiri mu kaga gishobora gutabarwa n’abantu bake cyane ariko bafite umutima.

2. Umujyi munini wa Sadoma na Gomora wanditse amateka kubera ubukozi bw’ibibi abaturage bawo biberagamo. Mu gihe wari wegereje kurimbuka , umuntu w’intungane witwa Abrahamu yagerageje kwitambika imbere y’uburakari bw’Uhoraho kugira ngo arebe ko yarokora abaturage bari bagiye kugubwaho n’ishyano,  bo ubwabo bikwegeye kubera imigenzereze yabo y’urukozasoni.

3.Abrahamu arajya mu biciro n’Imana kuko yemera ko abantu bake bazima bashobora gucungura benshi kabone n’iyo baba abagizibanabi kabuhariwe.

4.Abrahamu yatangiye yereka Imana ko abantu  50 b’intungane bashobora gukiza umujyi wose. Imana yarabyemeye. Abrahamu yagize impunge ko abantu 50 bazima bahobora kubura nuko akomeza kugabanya imibare aza guhagararira ku bantu 10. Icyaje gukurikiraho ni uko umujyi warimbutse, ni ukuvuga ko nta n’abantu 10 bazima bari bakiwurangwamo!!!

5.Isomo rya mbere twigiye aha ni uko iyo abantu bishoye mu bikorwa bibi bibagiraho ingaruka zishobora kubakururira ukurimbuka.

6.Irya kabiri ni uko igihugu kitakigiramo abantu b’intungane, bashyira mu gaciro, bamagana ubugome, ubwicanyi, ubusambanyi, ubujura, ivangura….amaherezo icyo gihugu kirakongoka kandi kigahitana benecyo.

7.Isomo rya gatatu ni uko n’Imana ifasha uwifashije. Iyo abantu biyemeje kugorama no kwisenya, nta bushobozi Imana igira bwo kubahagarika. Mu by’ukuri siyo ibarimbura, ni imigenzereze yabo mibi ibavunira umuheto!

III. ISOMO ku Banyarwanda bo muri iki gihe.

1.Inzara igiye kumara imbaga y’Abanyarwanda mu gihe abaherwe badamaraye bahugiye mu gukina n’amagambo, ngo si inzara ni amapfa., ngo abaturage ntibasuhutse ahubwo bagiye gusura benewabo…ukagira ngo ayo « mazina » niyo umuturage ushonje ashyira mu nkono akagaburira abana.

2.Ntawe utabona ko iyi nzara igiye kurimbura Abanyarwanda kandi ifitanye isano n’uruhererekane rwa gahunda mbi za Leta zishingiye ahanini kuri politiki yo guhuzagurika  no gushaka amaronko y’abategetsi hatitawe ku nyungu nyakuri za rubanda.

3.Twibuke :

(1)politiki mbisha yo kubuza abaturage guhinga ibyo bashaka kandi bibafitiye akamaro.

(2)politiki mbi yo kubuza abaturage korora itungo bashaka no kuba bariragira mu isambu yabo.

(3)politiki y’ubukunguzi yo kurandura imyaka mu mirima no gutema intooki z’abaturage.

(4) politiki yo kumena amata y’abaturage ngo nuko badashatse « kuyahera ubuntu » inganda z’abaherwe bo mu butegetsi.

(5) politiki yo guhinga igihingwa kimwe, kubuza abaturage gusarura imyaka bihingiye no kuyigurisha ku isoko bashaka…..

(6)politiki yo kubuza abaturage gukorera ingo zabo, bagahozwa mu manama y’urudaca kandi atabafitiye akamaro.

(7)politiki yo gupfukirana abaturage, bagahozwa ku iterabwoba n’ihagarikamutima, batera hejuru batabaza ntihagire umutegetsi ubatega ugutwi.

(8) urutonde ni rurerure!!

4.Aba baturage b’u Rwanda bamaze igihe bataka ariko nta mutegetsi umanuka ngo yumve ikibazo kiriho kandi gishakirwe umuti. Abategetsi bakagombye kuba begereye abaturage bahisemo kwiturira mu KINYOMA no mu guhakirizwa bitwikiriye IMIHIGO yo kwikirigita bagaseka ngo ngaha bageze ku ITERAMBERE ryo ku bipimo by’ indashyikirwa , ibyo bikavugwa mu gihe inzara iri kurimbura abaturage!!!

5.Ndatabariza Abaturage b’Abanyarwanda bazahajwe n’inzara, dore ni ukuri barashize kandi bapfuye urwagashinyaguro.

Ngiyo induru yarenze rubanda rw’i Rwanda. Ngiyo induru Nyagasani Imana atagishoboye kwihanganira.

UMWANZURO

Ubutegetsi bw’igihugu ntibushobora kubakirwa ku karengane, ikinyoma,iterabwoba, ivangura…(contre-valeurs) ngo icyo gihugu kizabure kurimbuka!

Mu Rwanda hakenewe impinduka ya karahabutaka, hakabaho ubutegetsi bwubakiye ku ndangaciro nzima( valeurs) nk’ukuri, ubutabera, urukundo, ugusarangaya ibyiza by’igihugu.

Iyo mpinduka nanjye niteguye kuyitangamo umuganda wanjye.

Niyo mpamvu nsaba abo twabyumva kimwe nti nimuze natwe tumanuke tujye I Kigali, dufatanye kureba uko iby’iyo nduru byatuza.

Icyumweru cyiza ku Bataripfana bo muri Norvege n’inshuti zabo za Nouvelle Generation , mwatwakiriye neza Imana ibibahere umugisha.

Happy birthday kuri Kizito Mihigo ukwiye gufungurwa bidatinze kuko yarenganyijwe bikomeye.

Dukomeze kandi dusabire abaturage bariho batikizwa n’inzara mu Rwanda, kandi ushoboye kugira uwo yafasha abyihutire kuko bikenewe.

Uwanyu, Padiri Thomas Nahimana.

 

In POLITICS  

Laisser un commentaire

Votre adresse de messagerie ne sera pas publiée.